Sigurður Ragnar: Voru skrefinu framar

Sigurður Ragnar Eyjólfsson sagði eftir leik Íslands og Frakklands í kvöld að honum þótti Frakkar hafa verið skrefinu framar í sínum aðgerðum í leiknum í kvöld. Frakkar unnu leikinn, 3-1.

„Þetta voru frekar ódýrar vítaspyrnur og það er of mikið að fá á sig tvær vítaspyrnur í leik gegn Frökkum sem eru með gríðarlega sterkt lið," sagði Sigurður Ragnar í fréttum Rúv eftir leik.

„Þær spiluðu mjög flottan og góðan fótbolta í dag og við vorum skrefinu á eftir í mörgum af okkar aðgerðum."

„Svo var það líka vendipunktur að við fáum víti í stöðunni 3-1 sem við náðum ekki að nýta okkur. En heilt yfir fannst mér þær skrefinu framar en við."