Tap í fyrsta leik á EM

Ísland náði ekki að fylgja eftir góðri byrjun í leiknum gegn Frökkum á EM í knattspyrnu í dag og tapaði að lokum, 3-1.

Það var rafmögnuð spenna á vellinum þegar leikurinn hófst enda Ísland að leika sinn fyrsta A-landsleik í úrslitakeppni stórmóts í knattspyrnu. Leikmenn virtust klárir í slaginn og ekki liðu nema rúmar fimm mínútur þar til fyrsta markið leit dagsins ljós.

Sóknin var glæsileg. Þóra Helgadóttir markvörður byrjaði með því að koma boltanum fljótt í leik á Katrínu Jónsdóttur sem gaf góða sendingu á Dóru Maríu Lárusdóttur á hægri kantinum. Hún var fljót að átta sig á því að Margrét Lára Viðarsdóttir var komin í langt hlaup upp kantinn og framlengdi boltann áfram.

Margrét Lára gaf sér góðan tíma til að tímasetja sendinguna fyrir markið og var hún glæsileg. Boltinn sveif yfir franska markvörðinn og rataði beint á kollinn á Hólmfríði Magnúsdóttur sem skoraði í autt markið. Glæsilegt mark eftir frábæra sókn hjá íslenska liðinu.

Frakkar reyndu hvað þeir gátu að svara fyrir sig en varð lítið ágengt. Ísland stóð af sér pressuna og Frakkar virtust bæði óöryggir í vörninni auk þess sem þeim gekk ekkert að skapa sér hættuleg færi.

En á sautjándu mínútu leiksins breyttist allt. Guðrún Sóley Gunnarsdóttir var dæmd brotleg fyrir viðskipti sinn við franska landsliðsfyrirliðann Sandrine Soubeyrand þó svo að hún hafi fyrst og fremst sparkað í boltann. Umdeildur vítaspyrnudómur og skoraði Camille Abily örugglega úr vítinu.

Stuttu síðar komust Frakkar í stórhættulegt færi en Þóra náði að verja glæsilega í markinu.

Eftir þetta gerðist ekki mikið í fyrri hálfleik, nema að tveir leikmenn Frakka þurftu að fara alblóðugir af velli eftir slæm höfuðhögg. Í fyrra skiptið skullu tveir Frakkar saman en í það síðara Candie Herbert og Guðrún Sóley. Sú fyrrnefnda virtist nokkuð illa slösuð og var umsvifalaust skipt af velli.

Rússneski dómarinn var áfram í aðalhlutverki í upphafi síðari hálfleiks. Fyrst dæmdi hún aukaspyrnu á íslenska liðið á hættulegum stað fyrir litlar sakir og svo dæmdi hún Frökkum annað víti. Í þetta sinn þótti Ólína Guðbjörg Viðarsdóttir gerast brotleg en aftur fyrir afar litlar sakir. Sonia Bompastor skoraði örugglega úr vítinu.

En þrátt fyrir allt mótlætið neituðu Íslendingar að gefast upp og fóru nú að vera meira með boltann. Illa gekk þó að skapa almennilega hættu við mark Frakkanna sem hreinlega pökkuðu í vörn.

En á 67. mínútu kom rothöggið. Louisa Necib átti fínt skot að marki utan vítateigs sem Þóra virtist ætla að ná að verja. Hún náði hins vegar ekki að klófesta boltann almennilega og boltinn rúllaði yfir marklínuna.

Tæpum tíu mínútum síðar fékk íslenska liðið þó smá vonarglætu eftir að víti var dæmt á Frakka fyrir brot á Dóru Maríu Lárusdóttur. Nú, hins vegar, var enginn vafi á um að víti var að ræða enda mótmæltu þær frönsku dómnum ekki neitt.

Margrét Lára tók vítið en lét verja frá sér. Enn eitt áfallið fyrir íslenska liðið staðreynd.

Þó svo að Ísland hafi verið meira með boltann það sem eftir lifði leiks áttu Frakkar eitt hættulegt færi enn. Þóra varði hinis vegar vel frá sóknarmanni Frakka sem var í góðri stöðu.

Margrét Lára var í tvígang nálægt því að ógna marki Frakka en allt kom fyrir ekki og niðurstaðan svekkjandi 3-1 jafntefli.

Tölfræði leiksins:

Ísland - Frakkland 1-3

1-0 Hólmfríður Magnúsdóttir (6.)

1-1 Camille Abily, víti (18.)

1-2 Sonia Bompastor, víti (53.)

1-3 Lousa Necib (67.)

Skot (á mark): 7-17 (3-12)

Varin skot: Þóra 9 - Bouhaddi 2

Horn: 4-2

Aukaspyrnur fengnar: 6-14

Rangstöður: 2-0

Leiknum var lýst beint á Boltavakt Vísis og Fréttablaðsins og má lesa lýsinguna hér: Ísland - Frakkland.