Zola útilokar að Upson verði seldur

Knattspyrnustjórinn Gianfranco Zola hjá West Ham segir félagið vera að leitast eftir því að styrkja leikmannahópinn í stað þess að missa lykilmenn áður en félagsskiptaglugginn lokar 1. september en varnarmaðurinn Matthew Upson hefur verið sterklega orðaður við Manchester City, Arsenal og Aston Villa síðustu daga.

Zola segir West Ham ekki hafa fengið nein kauptilboð í leikmanninn og vilji þess utan halda honum á Upton Park.

„Frá mínum bæjardyrum séð þá erum við ekki að leita eftir því að selja leikmenn. Við erum heldur ekki búnir að fá nein kauptilboð inn á borð til okkar í Upson og erum staðráðnir í að halda honum áfram hjá félaginu.

Ég held að Upson sjálfur njóti þess að spila fyrir West Ham og sé spenntur fyrir möguleikum liðsins á yfirstandandi leiktíð," segir Zola í viðtali við Daily Mirror.