Forráðamenn City neita fréttum um Mourinho

Forráðamenn enska úrvalsdeildarfélagsins Manchester City hafa þverneitað þeim fregnum sem birtust í morgun þess efnis að félagið hafi reynt að fá Jose Mourinho til að taka við knattspyrnustjórn liðsins.

Samkvæmt frétt í The Sun mun Jose Mourinho hafa verið boðið að taka við liðinu af Mark Hughes.

En City brást harkalega við þessum fregnum í yfirlýsingu sem birtist á heimasíðu félagsins.

„Varðandi frétt sem birtist í The Sun sem segir að Jose Mourinho hafi hafnað boði upp á 12,5 milljónir punda til að gerast knattspyrnustjóri Manchester City vill félagið koma eftirfarandi á framfæri:"

„Frétt þessi á sér enga stoð í raunveruleikanum og er félagið að skoða hvort grundvöllur sé fyrir lögsókn vegna þessa."