Deco vill fara frá Chelsea

Brasilíski Portúgalinn Deco hefur lýst því yfir að hann ætli sér að yfirgefa herbúðir Chelsea eftir skamma viðdvöl á Brúnni.

Deco kom frá Barcelona fyrir ári síðan, byrjaði vel hjá félaginu en endaði svo á bekknum og tók lítinn þátt í seinni hluta síðasta tímabils.

„Ég er með samning við Chelsea en hef tilboð frá öðrum félögum. Ég vil láta mér líða vel og mér líður ekki vel hjá Chelsea," sagði Deco.

„Ég vil finna mér nýtt félag þar sem ég get fundið aftur ánægjuna af því að spila fótbolta."

Deco hefur þegar verið orðaður við Inter og sjálfur hefur hann lýst yfir áhuga sínum á að starfa aftur með Jose Mourinho.