Algjört hrun í sölu bíla til fyrirtækja

Nýskráningar fyrirtækjabifreiða hafa dregist saman um 87 prósent það sem af er ári miðað við sama tímabil árið 2007. Aðeins hafa 1.704 bílar verið skráðir á fyrirtæki en á sama tíma árið 2007 voru þeir 12.715. Sjaldgæft er að fleiri nýskráningar séu hjá einstaklingum, en þær eru 2.104 það sem af er ári. Heildarsamdráttur nýskráninga er því um 81 prósent frá árinu 2007.

„Þetta sýnir að það er algjört stopp í fjárfestingum fyrirtækja," segir Vilhjálmur Egilsson, framkvæmdastjóri Samtaka atvinnulífsins. Segir Vilhjálmur að Seðlabankinn þurfi að lækka stýrivexti strax. „Það fjárfestir enginn á þessum vöxtum."

Özur Lárusson, framkvæmdastjóri Bílgreinasambandsins, segir bílasölur finna vel fyrir samdrættinum. „Það er algjört hrun í sölu bifreiða," segir Özur en um 230.000 bílar eru nú á götum Íslands.

Ýmsar leiðir eru færar til að auka veltuna, að mati Özurar, til dæmis að lækka tolla. Bílgreinasambandið átti fund með fjármálaráðherra fyrr í sumar um útfærslu hugmyndar um afslátt af vörugjöldum.

Hugmynd Bílgreinasambandsins var sú að fólk sem fargaði gömlum bílum, til dæmis eldri en tíu ára, fengi afslátt af vörugjöldum fyrir kaup á nýjum og umhverfisvænni bíl. Segir Özur fjármálaráðherra hafa verið jákvæðan fyrir hugmyndinni. Vörugjöld af bílum geta numið um 45 prósentum af verði bifreiðar og virðisaukaskattur um 24,5 prósentum.

Benedikt Eyjólfsson, eigandi Bílabúðar Benna, segist finna fyrir þessu eins og flestir landsmenn en fyrirtækið reyni að halda þjónustu við viðskiptavini.

„Þetta yrði betra ef gengið skánaði og vextir lækkuðu," segir Benni. Tímabundin lækkun vörugjalda gæti verið til bóta, að mati Benna, þar sem vörugjöld séu stór hluti af verði bifreiða. Bíll sem skilaði 300 þúsund krónum til ríkisins fyrir tveimur árum skilar nú 600 þúsund krónum þar sem vörugjaldið miðast við gjaldmiðilinn sem bíllinn er keyptur á, að sögn Benna.

Tölulegar upplýsingar koma frá Umferðarstofu og miða tölurnar við tímabilið frá 1. janúar til 20. ágúst öll árin.