Sagna hefur áhuga á Real

Bacary Sagna, leikmaður Arsenal, segist ekki vera mótfallinn þeirri hugmynd að ganga til liðs við Real Madrid nú í sumar.

Sagna er einn fjölda leikmanna sem hefur verið orðaður við Real Madrid undanfarna daga. Liðsfélagi hans hjá Arsenal, Gael Clighy, var einnig sterklega orðaður við Real en sagðist vilja vera áfram í Lundúnum.

Sagna sagði í samtali við franska fjölmiðla lítið vita um málið og að það hafi komið honum á óvart.

„Ég var spenntur fyrir því að byrja aftur með Arsenal en við skulum sjá til. Ég er ekki mótfallinn þessari hugmynd."