Atli á leið til Stjörnunnar

Miðjumaðurinn Atli Jóhannsson verður væntanlega orðinn leikmaður Stjörnunnar á næstu klukkutímum. Þetta fékk Vísir staðfest fyrr í dag.

„Við erum að vonast eftir því að geta kynnt Atla til leiks í fyrramálið og jafnvel í kvöld ef vel gengur," sagði Sigurður Hilmarsson, formaður meistaraflokksráðs Stjörnunnar.

Atli ákvað að yfirgefa herbúðir KR á dögunum og virðist vera á leið til Stjörnunnar eftir því sem Sigurður segir.

Marel Baldvinsson hefur einnig verið orðaður við Stjörnuna. Sigurður staðfesti að þreifingar hefðu átt sér stað en það mál væri ekki jafn langt komið og mál Atla.