David Winnie: Gunnleifur var strippari

David Winnie, fyrrum leikmaður og þjálfari KR, segir í samtali við The Sun í dag að hann minnist þess að Gunnleifur Gunnleifsson, annar markvarða íslenska landsliðsins, hafi drýgt tekjurnar sínar sem fatafella á meðan þeir voru saman í KR.

„Gunnleifur var nokkuð klikkaður í markinu en mjög góður markvörður," sagði Winnie. „Það furðulega er að hann var fatafella í hlutastarfi, ef ég man rétt. En ég veit að hann hefur sagt skilið við þann hluta af lífi sínu í dag."

„Margir strákanna í liðinu voru í vinnu eða námi með fótboltanum en hann var eini stripparinn."

Winnie sagði enn fremur að Gunnleifur ætti góðan möguleika á því að vera í byrjunarliði íslenska landsliðsins í kvöld. Hann sagði einnig í viðtalinu að hann hafi spilað með nokkrum leikmönnum íslenska landsliðsins hjá KR - þeirra á meðal Eiði Smára Guðjohnsen, Kristjáni Erni Sigurðssyni og Stefáni Gíslasyni sem verður reyndar í banni í kvöld.

„Það þýðir ekkert að gefa þeim tækifæri til að koma sér inn í leikinn því þeir munu nýta sér þau," sagði Winnie sem starfar sem lögfræðingur í London í dag. „En á móti kemur að Ísland gefur alltaf færi á sér og þá verðum við að vera á tánum."