Shearer verður fjórði stjóri Newcastle á tímabilinu

Alan Shearer hefur tekið við stjórastöðunni hjá enska úrvalsdeildarliðinu Newcastle samkvæmt fjölmiðlum í Englandi og mun stjórna liðinu út tímabilið en liðið er í harðri fallbaráttu í deildinni.

Shearer sem er 38 ára og fyrrum stjörnuleikmaður félagsins hefur oft verið í umræðunni í öllum stjóraskiptunum á undanförnum misserum en hann sjálfur hefur síðan margoft gagnrýnt fyrirrennara sína í stjórastólnum.

Shearer verður fjórði stjóri Newcastle á þessu tímabili. Kevin Keegan hóf tímabilið, Joe Kinnear tók við af honum en þurfti síðan að gangast undir hjartaaðgerð og á meðan tók Chris Hughton við tímabundið.

Það hefur gengið illa hjá Chris Hughton enda hefur liðið dregist inn í miðju fallbaráttunnar undir hans stjórn. Liðið vann ekki leik og náði aðeins þremur stigum út úr fimm leikjum.

Newcastle á eftir átta leiki á tímabilinu. Fyrsti leikurinn undir stjórn Shearer verður á móti Chelsea en síðan bíða leikir á móti Stoke, Tottenham, Portsmouth, Liverpool, Middlesbrough, Fulham og Aston Villa.