Kannast ekki við samkomulag um áhættusæknari fjárfestingar

Enginn stjórnarmaður hjá Styrktarsjóði hjartveikra barna kannast við að hafa undirritað nýjan samning við Landsbankann, sem heimilaði áhættusæknari fjárfestingar með fjármuni sjóðsins. Stjórnin undirritaði hins vegar viðauka, þar sem bankanum er heimilað að fjárfesta í erlendum gjaldeyri - þar er hins vegar tekið fram að 90% peninganna skuli varið í ríkisbréf.

Styrktarsjóðurinn tapaði 21 milljón í peningabréfum Landsbankans, og hefur stefnt bankanum fyrir að brjóta fjárfestingasamning. Sjóðurinn hélt að peningarnir væru í ríkisskuldabréfum. Við hrunið kom hins vegar í ljós að þeir voru í peningabréfum, með skuldabréfum fyrirtækja á borð við Baug, FL Group og Samson, sem nú heyra sögunni til.

Í minnisblaði úr Landsbankanum kemur fram að ný fjárfestingastefna hafi verið undirrituð í maí 2008.

Guðrún Pétursdóttir, stjórnarformaður sjóðsins, sagði í samtali við fréttastofu að á umræddum fundi hafi viðauki við eldri fjárfestingasamning verið undirritaður - ekki nýr samningur. Í honum heimili stjórn sjóðsins bankanum að fjárfesta að einhverju leyti í erlendum gjaldmiðli. Í þessum viðauka sé hins vegar tekið fram, eins og fyrri samningur segi til um, að 90% af fjármununum skuli varið í innlend ríkisskuldabréf og ríkisvíxla. Aðilum ber ekki saman hér, því í minnisblaði Landsbankans kemur fram að ekkert í samningnum kveði á um lágmark í kaupum á ríkisskuldabréfum.

Guðrún segist ítrekað hafa reynt að ná í Pál Benediktsson, upplýsingafulltrúa bankans, í dag til að biðja um að fá að sjá umræddan fjárfestingasamning, án árangurs.

Páll sagði í samtali við fréttastofu í dag að Landsbankinn standi við það sem fram hafi komið í málinu af hálfu bankans, ný fjárfestingastefna hafi verið undirrituð. Fréttastofa fékk hins vegar ekki að sjá samninginn. Ástæðan er bankaleynd.