Mikilvægi Margrétar Láru eykst hjá Linköping

Sænska landsliðskonan Josefine Öqvist mun að öllum líkindum missa af fyrri hluta tímabilsins með Linköping eftir að ljóst varð að hún þarf að fara í aðra hnéaðgerð. Öqvist missir líklega líka af EM í Finnlandi í ágúst.

Öqvist er 26 ára framherji sem getur líka spilað framarlega á miðjunni. Hún var annar markahæsti leikmaður Linköping á síðasta tímabili með níu mörk.

Mikilvægi hennar er mikið í sóknarleik Linköping og því horfa Svíarnir örugglega til Margrétar Láru Viðarsdóttur um að fylla í hennar skarð.

Öqvist skoraði 3 mörk í 8 landsleikjum á síðasta ári og hefur alls skorað 11 landsliðsmörk í 50 leikjum.