Manchester United tapaði fyrir Bayern Munchen í vítakeppni

Bayern Munchen vann Englandsmeistara Manchester United í vítakeppni í úrslitaleik Audi-bikarsins í á Allianz Arena í Munchen í gær. Manchester United fór illa með mörg góð færi í leiknum sem endaði með markalausu jafntefli.

Dimitar Berbatov átti skot í stöngina í leiknum og bæði Michael Owen og Wayne Rooney fengu fín færi til þess að skora.

Michael Rensing, markvörður Bayern Munchen varði frá bæði Patrice Evra og Jonny Evans í vítakeppninni sem endaði með 7-6 sigri Bayern Munchen. Daniel van Buyten tryggði þýska liðinu sigurinn.

Bayern Munchen byrjar því vel undir stjórn Louis Van Gaal sem tók við þýska liðinu í sumar.

Leikurinn um þriðja sætið fór einnig í vítakeppni þar sem argentínska liðið Boca Juniors hafði betur en ítalska liðið AC Milan eftir 1-1 jafntefli í sjálfum leiknum. Boca vann vítakeppnina 4-3.