Fyrirvararnir kalla ekki á viðræður um nýtt samkomulag

Þær breytingartillögur sem meirihluti fjárlaganefndar Alþingis samþykkti í nótt varðandi Icesave samkomulagið kalla ekki á viðræður um nýtt samkomulag við Breta og Hollendinga, að mati Steingríms J. Sigfússonar fjármálaráðherra.

Frumvarp ríkisstjórnarinnar um ríkisábyrgð vegna Icesave samkomulagsins var afgreitt út úr fjárlaganefnd Alþingis klukkan tvö í nótt með stuðningi allra flokka nema Framsóknarflokks. Bjarni Benediktsson, formaður Sjálfstæðisflokksins, segir fyrirvaranna það mikla að gera verði Bretum og Hollendingum nýtt tilboð.

Ráðherrann segist vera sáttur með efnislega niðurstöðu fjárlaganefndar. „Ég tel að þetta séu málefnalegir, sanngjarnir og útskýranlegir skilmálar sem að viðsemjendur okkar hafa vonandi skilning á."

Steingrímur er mjög ánægður með að fjárlaganefnd hafi lokið afgreiðslu málsins. „Það góða fólk á hrós og heiður skilið fyrir mikla vinnu. Í öðru lagi er ég afar ánægður með þá breiðu samstöðu sem tókst um afgreiðslu málsins. Ég held að þetta sé málinu sjálfinu, þjóðinni og þinginu mjög til framdráttar."