Umfjöllun: Draumabyrjun Fylkismanna

Fylkismenn hafa byrjað Pepsi-deildina af miklum krafti og er nú eina liðið sem hefur haldið marki sínu hreinu í fyrstu tveimur umferðunum.

Fylkir vann í kvöld 2-0 sigur á Keflavík á heimavelli sínum en bæði mörkin skoraði Valur Fannar Gíslason úr vítaspyrnum í síðari hálfleik.

Fylkismenn léku undan vindi í fyrri hálfleik en tókst þó ekki að færa sér það í nyt að neinu ráði. Bæði lið fengu ágæt færi snemma í leiknum en lítið markvert gerðist á síðasta hálftímanum. Keflvíkingar náðu að halda heimamönnum nokkuð aftarlega á vellinum sem að sama skapi reyndu stungusendingar og skyndisóknir en með litlum árangri.

Fyrirliði Keflvíkinga, Hólmar Örn Rúnarsson, þurfti að fara meiddur af velli í hálfleik og var þar með stórt skarð höggvið í miðjuspil Keflvíkinga. Fylkismenn tóku hreinlega völdin í leiknum og eftir aðeins þriggja mínútna sókn sem endaði með því að þeir fengu vítaspyrnu.

Guðjón Árni Antoníusson var dæmdur brotlegur eftir viðskipti sín við Kjartan Ágúst Breiðdal en dómurinn var nokkuð umdeildur. Guðjón Árni virtist ná til boltans. Engu að síður var vítið dæmt og skoraði Valur Fannar af öryggi úr spyrnunni eftir að hafa sent Lasse Jörgensen í vitlaust horn.

Fylkismenn héldu áfram að sækja eftir þetta og stýrðu í raun leiknum frá a til ö. Hættulegasta færið fékk Andrés Már Jóhannesson sem skallaði hárfínt yfir mark Keflavíkur eftir hornspyrnu á 68. mínútu.

Þremur mínútum dró aftur til tíðinda, aftur eftir góða sókn Fylkismanna. Í þetta sinn braut Bjarni Hólm Aðalsteinsson á Ingimundi Níels Óskarssyni og í þetta sinn lék enginn vafi á vítaspyrnudóminum. Valur Fannar skoraði af öryggi og aftur í sama horn en í þetta sinn stóð Lasse Jörgensen markvörður stjarfur á línunni.

Keflvíkingar reyndu að sækja eftir þetta en þegar þarna var komið var liðið varla búið að eiga skot að marki og ekki búið að fá hornspyrnu í leiknum. Fylkismenn börðust þó áfram af miklum krafti og hleyptu þeim bláklæddu aldrei í nein hættuleg færi. Varnarleikur Fylkismanna var mjög góður og þó svo að sóknarleikurinn hafi löngum stundum verið nokkuð hættulaus var sigurinn engu að síður sanngjarn.

Keflvíkingar áttu ekki góðan dag og hafa oftast spilað betur en þeir gerðu í kvöld. Þeir söknuðu Hólmars mikið í síðari hálfleik og kom þá berlega í ljós hversu mikilvægur hann er liðinu.

Fylkir - Keflavík 2-0

1-0 Valur Fannar Gíslason, víti (49.)

2-0 Valur Fannar Gíslason, víti (71.)

Fylkisvöllur. Áhorfendur: Óuppgefið.

Dómari: Jóhannes Valgeirsson (7)

Skot (á mark): 8-6 (4-4)

Varin skot: Fjalar 4 - Jörgensen 2.

Horn: 6-2

Aukaspyrnur fengnar: 8-21

Rangstöður: 11-3

Fylkir (4-4-2):

Fjalar Þorgeirsson 7

Andrés Már Jóhannesson 7

Kristján Valdimarsson 8 - maður leiksins

Einar Pétursson 7

Tómas Þorsteinsson 7

Ásgeir Börkur Ásgeirsson 7

Valur Fannar Gíslason 8

Halldór Arnar Hilmisson 6

(75. Ólafur Stígsson -)

Kjartan Ágúst Breiðdal 6

Pape Mamadou Faye 4

(75. Kjartan Andri Baldvinsson -)

Ingimundur Níels Óskarsson 6

(86. Felix Hjálmarsson -)

Keflavík (4-4-2):

Lasse Jörgensen 6

Guðjón Árni Antoníusson 5

Alen Sutej 8

Bjarni Hólm Aðalsteinsson 6

Brynjar Örn Guðmundsson 6

Jóhann Birnir Guðmundsson 7

Jón Gunnar Eysteinsson 5

Hólmar Örn Rúnarsson 6

(46. Einar Orri Einarsson 5)

Símun Samuelsen 6

Magnús Sverrir Þorsteinsson 5

(63. Hörður Sveinsson 5)

Haukur Ingi Guðnason 5

(74. Magnús Þór Magnússon -)

Leiknum var lýst beint á Boltavakt Vísis og Fréttablaðsins og má lesa þá lýsingu hér: Fylkir - Keflavík.