Sérstakur saksóknari fær aðgang að gögnum í Bretlandi og Lúxemborg

Embætti sérstaks saksóknara hefur nú samið við yfirvöld í Lúxemborg og Bretlandi um aðgengi að gögnum og framkvæmd rannsóknaraðgerða. Ólafur Þór Hauksson, sérstakur saksóknari, segir þá stöðu geta komið upp að einstaklingur sem er viðriðinn bankahrunið hér á landi hafi einnig gerst brotlegur í Bretlandi.

Ólafur Þór Hauksson, sérstakur saksóknari, átti þrjá fundi í Lúxemborg fyrr í vikunni en Europol átti veg og vanda að skipulagningu þeirra. Ólafur fundaði með þeirri deild lögreglunnar sem hefur með framgang réttarbeiðna milli landa að gera. Í réttarbeiðni felst beiðni innlendra yfirvalda til erlendra til að framkvæma rannsóknaraðgerðir, svo sem skýrslutökur eða húsleitir. Þá fundaði Ólafur einnig með saksóknurum og rannsóknardómurum.

„Það var komið á tengingu á milli og það er fullur vilji til samstarfs," segir Ólafur.

Ólafur segir að þetta muni aðallega nýtast embættinu ef að þörf er á gögnum frá Lúxemborg eða til að fá fólk sem búsett er erlendis yfirheyrt.

„Við höfum boðað Íslendinga til yfirheyrslu á Íslandi. Þeir sem eru búsettir erlendis hafa mætt í yfirheyrslur en það getur komið til þess að við þurfum að yfirheyra aðila með erlent ríkisfang og eru búsettir erlendis."

Ólafur og Eva Joly funduðu einnig með Richard Alderman yfirmanni bresku efnahagsbrotadeildarinnar í gær.

„Þar var lagður grunnur af samstarfi sem felur í sér það sama, þeas gagnkvæma aðstoð."

Þá mun breska efnahagsbrotadeildin senda sérfræðinga hingað til lands og segir Ólafur að þeir muni fyrst og fremst horfa til þeirra mála sem hafa snertifleti í báðum löndunum.

Aðspurður hvort að einhver sem tengist bankahruninu hér á landi hafi einnig gerst brotlegur við bresk lög sagði Ólafur: „Það er of snemmt að fullyrða um það, en það er alveg mögulegt að slíkt komi upp."