Lokið við stækkun friðlands í Þjórsárverum snemma næsta árs

Undirbúningur að stækkun friðlandsins í Þjórsárverum hefst nú þegar samkvæmt tillögu Svandísar Svavarsdóttur, umhverfisráðherra, sem var samþykkt á fundi ríkisstjórnarinnar í morgun. Í tilkynningu frá umhverfisráðuneytinu segir að Svandís vilji ljúka stækkun friðlandsins eigi síðar en snemma árs 2010.

Í samstarfsyfirlýsingu ríkisstjórnarinnar segir að friðlandið í Þjórsárverum verði stækkað og friðun þess lokið hið fyrsta.

Í tilkynningunni segir að stækkunin verði unnin í samræmi við ákvæði náttúruverndarlaga. Undirbúningurinn verður í höndum Umhverfisstofnunar í samráði við landeigendur, viðkomandi sveitarfélög og aðra þá sem hagsmuni eiga að gæta.