Stelpurnar okkar: Ekki löng rútuferð á keppnisvöllinn

Það verður ekki langt að fara fyrir íslenska kvennalandsliðið þegar það leggur af stað í Frakkaleikinn frá hótelinu sínu. Völlurinn í Tampere er aðeins í fimm mínútna göngufjarlægð frá hóteli stelpnanna og hann blasir við þeim þegar þær horfa út um herbergisgluggann sinn.

Keppnisvöllurinn blasir líka við meira en helmingi leikmanna liðsins þegar þær horfa út um herbergisgluggann sinnen íslenska liðið hefur aðsetur á áttundu hæð hótelsins með góða yfirsýn yfir leikvöllinn við hliðina.

Klara Bjartmarz, skrifstofustjóri KSÍ og starfsmaður landsliðsnefndar kvenna, hefur farið í ótal keppnisferðir en hún man ekki eftir að íslenska kvennalandsliðið hafi búið svona nálægt keppnisvellinum enda þarf liðið stundum að ferðast í allt að klukkutíma á leikstað.

Að þessu sinni tekur því varla að setjast upp í rútuna því ferðin mun taka í mesta lagi tvær mínútur. Það kemur þó ekki til greina að ganga enda þarf að fylgja reglum UEFA og ferðast á ákveðinn hátt þó að rútuferðin sé stutt.