Palacios á leið til Tottenham

Steve Bruce, knattspyrnustjóri Wigan, segir að félagið hafi í helstu aðalatriðum samþykkt að selja miðvallarleikmanninn Wilson Palacios til Tottenham.

Tilboðið er sagt nema um fjórtán milljónum punda en Wigan mun hafa hafnað öðru tilboði frá Tottenham upp a tíu milljónir punda.

„Félögin hafa nánast komið að samkomulagi um kaupverð. Nú snýst málið um hvernig greiðslan verði reidd af hendi."

„Wilson er þó enn með okkur og tekur þátt í undirbúningnum fyrir leikinn gegn Manchester City á morgun af fullum krafti. Svona er staðan núna en við skulum sjá hvað gerist á næstu klukkutímum."

Palacios er frá Hondúras og kom til Wigan fyrir ári síðan. Hann hefur staðið sig afar vel og verið orðaður við fjöldamörg lið víða um Evrópu.