Kínverji njósnaði hjá Boeing

Kínverji á áttræðisaldri, búsettur í Bandaríkjunum, hefur verið fundinn sekur um iðnaðarnjósnir í þágu Kínverja. Maðurinn stal ýmsum gögnum frá Boeing-verksmiðjunum, þar sem hann starfaði áður sem verkfræðingur, og mun hafa komið sér upp aðgangi að öllum svæðum verksmiðjanna án þess að öryggisverðir yrðu þess varir. Sýnt var fram á að njósnirnar hefðu staðið yfir frá árinu 1979 og hefði maðurinn fengið bréfleg fyrirmæli frá Kína. Meðal þess sem hann komst yfir eru teikningar af B-1 sprengjuflugvélinni en við húsleit heima hjá honum fundust yfir 250.000 skjöl frá Boeing.