Sjálfstæðismönnum líst illa á seinagang við stjórnarmyndun

Þingmenn Sjálfstæðisflokksins hafa áhyggjur af þeirri seinkun sem hefur orðið á myndun nýrrar ríkisstjórnar Vinstri hreyfingarinnar - græns framboðs og Samfylkingarinnar. Mikilvægt sé að ný ríkisstjórn geti tekið til starfa sem fyrst.

Sigurður Kári Kristjánsson, þingmaður Sjálfstæðisflokksins, segir að sér sýnist að allt sé upp í loft í stjórnarmyndunarviðræðum. Hver höndin sé upp á móti annari eins og við hafi verið að búast. Hann segist skilja vel að Framsóknarflokkurinn eigi erfitt með að styðja þá ríkisstjórn sem nú er í burðarliðnum.

Kristján Þór Júlíusson segir hins vegar að sér þyki merkilegt hvernig Vinstri græn og Samfylkingin séu orðin gíslar Framsóknarflokksins. Hann segir að nú hafi heil vika farið í pappírsvinnu sem lítið gagn sé í og hann vonist því til að ný ríkistjórn verði til sem fyrst svo hún geti farið að koma sér að verki. Uppákoman í dag sé hins vegar pínleg í ljósi yfirlýsinga Steingríms J. Sigfússonar og Jóhönnu Sigurðardóttur um að ríkistjórnin yrði kynnt í dag eða á morgun.

Illugi Gunnarsson sagði í samtali við fréttastofu að sér litist illa á þann vandræðagang sem virðist vera kominn í stjórnarmyndunarviðræður. Hann sagðist hins vegar vonast til að niðurstaða fáist sem fyrst í ágreiningsmál svo ný ríkisstjórn geti tekið til starfa.