Segja leiðréttingu skulda vísi að samfélagssátt

„Öll þessi samtök voru alveg sammála um það að fleiri og fleiri væru að koamst í þá stöðu að gefast upp. Geta fólks til að greiða af lánum er að bresta og viljinn líka," segir Grétar Jónasson, framkvæmdastjóri Félags fasteignasala.

Félag fasteignasala hélt fund í vikunni ásamt Húseigendafélaginu, Samtökum heimilanna, talsmanni neytenda, Búseta á Norðurlandi og Lögmönnum Laugardal þar sem skuldastaða heimilanna var rædd.

Grétar segir hópinn hafa komið fram sem málsvara almennings undanfarna mánuði - hingað til í sitthvoru lagi en aðilar hans séu nú að stilla saman strengi sína.

Að sögn Grétars er það einörð afstaða hópsins, sem mun hittast aftur eftir tíu daga, að brýnt sé að grípa til almennra ráðstafana til að leiðrétta verðtryggð og gengistryggð lán heimilanna. Þeir segja forsendur að baki lánunum brostnar og sífellt fleiri heimili landsins lenda í alvarlegum vanda.

Þá segir Grétar fólki líða líkt og það taki skellinn af ófyrirséðum atburðum meðan dæmi séu um að fyrirtæki fái skuldir afskrifaðar að stóru leyti. Eins segir hann fólk minnugt þess þegar stjórnvöld ákváðu að tryggja innistæður fjármagnseigenda með fjármunum almennings þegar lagðir voru 200 milljarðar í peningamarkaðssjóði.

„Það er stöðugt að byggjast upp meiri reiði meðal fólks," segir Grétar. Hann segir fólk komið með nóg og finnist að það þurfi að koma til leiðréttingar sem sýni að það sé verið að gera eitthvað fyrir fólkið í landinu.

„Það myndi vera vísir að því að skapa samfélagslega sátt," segir Grétar.