Mikilvægt félag vill fá Adebayor

Umboðsmaður framherjanst Emmanuel Adebayor heldur því fram að afar mikilvægt lið hafi sett sig í samband við Arsenal með áhuga á að kaupa leikmanninn en segir engan áhuga vera frá Man. Utd eða Chelsea.

Slúðurblöðin á Englandi hafa orðað Adebayor við Chelsea og segja Arsenal hafa boðið Inter og AC Milan upp á að kaupa leikmanninn til að forðast að hann fari til Chelsea.

AC Milan reyndi að kaupa Adebayor síðasta sumar og koma Carlo Ancelotti til Chelsea varð þess valdandi að félagið var orðað við Adebayor.

„Ég hef ekkert í höndunum sem bendir til þess að Man. Utd og Chelsea séu að reyna að kaupa leikmanninn," sagði umboðsmaður Adebayor.

„Það er staðreynd að Carlo Ancelotti er afar hrifinn af leikmanninum þar sem hann reyndi að kaupa hann í fyrra. Chelsea hefur samt ekki verið í sambandi við okkur. Við höfum ekki fengið nein símtöl frá AC Milan eða Ancelotti en annað félag, sem er mjög mikilvægt, hefur haft samband. Ég get ekki sagt ykkur meira á þessu stigi."