Karl Georg sýknaður af ákæru um fjársvik

Karl Georg Sigurbjörnsson, lögmaður, sem ákærður var fyrir að hafa blekkt Sigurð Þórðarson, fyrrverandi ríkisendurskoðanda til að selja stofnfjárbréf í Sparisjóði Hafnarfjarðar á 25 milljónir hvert í stað 45 milljóna, var í dag sýknaður í Héraðdómi Reykjavíkur.

Karl Georg segir að niðurstaðan sé gríðarlegur léttir fyrir sig. Hann sagði einnig að loknum dómi að vissir aðilar í kerfinu hafi unnið gegn sér með miklu offorsi í kjölfar þess að hann flutti mál gegn ríkinu og þar nefndi hann sérstaklega Jón H.B Snorrason, saksóknara hjá lögreglunni á höfuðborgarsvæðinu.

Helgi Magnús Gunnarsson, saksóknari efnahagsbrota hjá Ríkislögreglustjóra, segir að málinu verði líklega áfrýjað.

Karl Georg var ákærður fyrir að hagnýta sér „ranga hugmynd" Sigurðar um hámarkverð á bréfunum. Karl er ákærður fyrir að hafa greitt 25 milljónir fyrir hvert bréf.

Félagið A. holding í Lúxemborg sem er í eigu Baugs seldi bréfin síðan á 45 milljónir hvert bréf. Við meðferð málsins sagðist Karl Georg aðeins hafa verið milligöngumaður og ekkert haft með verð bréfanna að gera sem hafi verið það sama og aðrir seljendur fengu.