Umfjöllun: Verðskuldaður sigur Blika á Fylki

Breiðablik vann í kvöld verðskuldaðan 1-0 sigur á Fylki á Kópavogsvelli. Arnar Grétarsson skoraði eina mark leiksins snemma í seinni hálfleik en það mark var nokkuð skondið.

Kópavogsvöllur var blautur og þónokkuð rok. Þessar erfiðu aðstæður höfðu bersýnilega áhrif á leikinn, sérstaklega til að byrja með. Fylkismenn byrjuðu talsvert betur og voru mun meira ógnandi. Þeir áttu góða samleikskafla og voru nálægt því að skapa sér opin færi.

Eftir fyrsta stundarfjórðunginn jafnaðist leikurinn hinsvegar út. Bæði lið reyndu mikið að notast við langskot sem markverðirnir áttu í nokkur skipti í smá vandræðum með enda völlurinn blautur. Ekkert mark var skorað í fyrri hálfleik.

Blikar tóku svo forystuna í þeim síðari. Arnar átti fyrirgjöf ætlaða Guðmundi Péturssyni. Guðmundur náði þó ekki til knattarins en það skipti engu máli því hann flaug í hornið fjær. Spurningamerki má setja við markvörslu Ólafs Þórs Gunnarssonar.

Eftir þetta mark tóku Blikar öll völd á vellinum og voru líklegri til að bæta við en Fylkismenn að jafna. Gestirnir vildu þó fá vítaspyrnu þegar Andrés Már Jóhannesson féll í teignum en Garðar Örn Hinriksson spjaldaði Andrés fyrir leikaraskap.

Valur Fannar Gíslason, fyrirliði Fylkis, var stálheppinn að fá ekki rautt spjald í seinni hálfleik. Hann fékk gula spjaldið í fyrri hálfleiknum og fékk síðan ansi mikið svigrúm frá dómaranum þrátt fyrir að brjóta af sér þónokkrum sinnum. Þetta vakti litla kátínu hjá Blikum á bekknum.

En þeir grænklæddu héldu áfram að vera betri og hefðu vel getað bætt við marki. Guðmundur Pétursson var virkilega sprækur og skapaði mikla ógn í sífellu. Breiðablik vann mikilvægan 1-0 sigur og náði að lyfta sér aðeins frá botninum en ekki er hægt að segja annað en að sigur liðsins hafi verið fyllilega verðskuldaður.

Breiðablik - Fylkir 1-0

1-0 Arnar Grétarsson (52.)

Kópavogsvöllur. Áhorfendur: 686

Dómari: Garðar Örn Hinriksson 6

Skot (á mark): 14-6 (6-4)

Varin skot: Ingvar 4 - Ólafur 5

Hornspyrnur: 7-6

Rangstöður: 3-3

Aukaspyrnur fengnar: 20-11

Breiðablik 4-3-3

Ingvar Þór Kale 6

Árni Kristinn Gunnarsson 7

Elfar Freyr Helgason 5

Kári Ársælsson 6

Kristinn Jónsson 7

Finnur Orri Margeirsson 7

Arnar Grétarsson 8* - Maður leiksins

(84. Haukur Baldvinsson)

Guðmundur Kristjánsson 7

Olgeir Sigurgeirsson 6

Kristinn Steindórsson 7

Guðmundur Pétursson 8

Fylkir 4-4-2

Ólafur Þór Gunnarsson 5

Andrés Már Jóhannesson 6

Kristján Valdimarsson 6

Einar Pétursson 6

Þórir Hannesson 5

Ásgeir Börkur Ásgeirsson 6

Valur Fannar Gíslason 6

Halldór Arnar Hilmisson 4

(67. Arnar Þór Úlfarsson 5)

Kjartan Ágúst Breiðdal 5

Jóhann Þórhallsson 6

(57. Kjartan Andri Baldvinsson 6)