FIFA íhugar að refsa Thierry Henry fyrir höndina frægu

Thierry Henry er ekki sloppinn þrátt fyrir að hafa beðist formlega afsökunar á því að hafa notað höndina þegar hann lagði upp jöfnunarmarkið mikilvæga fyrir Frakka í umspilsleik við Íra um sæti á HM í Suður-Afríku næsta sumar.

FIFA mun taka málið hans fyrir á fundi á morgun og þar kemur til greina að refsa Barcelona-manninum fyrir "svindlið".

Sepp Blatter, forseti FIFA, hefur talað við Theirru Henry og þegar Frakkinn spurði út í hugsanlega refsingu þá svaraði Blatter að málið yrði tekið fyrir hjá framkvæmdastjórninni.

FIFA mun þar fara yfir málið á öllum hliðum og líklegt þykir að niðurstaðan verði kynnt um leið og þær aðgerðir sambandsins til þess að koma í veg fyrir svona áberandi mistök í framtíðinni.

Meðal þess sem kemur til greina er að setja fimm dómara á leikina á HM næsta sumar þar sem tveimur marklínudómurum yrði bætt við eins og viðgengst í Evrópudeildinni í vetur.

Sepp Blatter hefur hinsvegar gefið það hreint og ákveðið út að myndbandstæknin verði ekki tekin upp í kringum dómgæslu í fótboltaleikjum og að FIFA muni áfram leggja áherslu á mannlega þáttinn í kringum fótboltann.