Fyrstu mörk Anderson og Valencia tryggðu United sigur á Boca

Manchester United vann 2-1 sigur á argentínska liðinu Boca Juniors í undanúrslitaleik Audi-bikarsins sem fer nú fram í Munchen í Þýskalandi. United mætir annaðhvort AC Milan eða Bayern Munchen í úrslitaleiknum á morgun.

Brasilíumaðurinn Anderson var ekki búinn að skora í fyrstu 76 leikjunum fyrir United en hann skoraði stórglæsilegt mark í kvöld með skoti beint úr aukaspyrnu.

Antonio Valencia var að spila sinn fyrsta leik með United síðan að liðið keypti hann frá Wigan en markið skoraði hann eftir einstaklingsframtak í lok fyrri hálfleiks.

Boca Juniors minnkaði muninn í seinni hálfleik þegar Federico Insua skoraði með laglegu skoti eftir fyrirgjöf frá hægri.