Líklegir endurfundir hjá Mourinho og Deco

Flest virðist nú benda til þess að miðjumaðurinn Deco yfirgefi Chelsea til þess að fara til Inter og spila aftur fyrir knattspyrnustjórann José Mourinho en félagarnir unnu Meistaradeildina saman með Porto árið 2004.

Deco kom til Chelsea síðasta sumar en fann sig ekki í ensku úrvalsdeildinni og hefur ekki farið leynt með vilja sinn að yfirgefa félagið.

Mourinho hefur til þessa ekki tjáð sig mikið um málið en hann viðurkenndi þó í samtali við ítalska fjölmiðla að hann væri meira en til í að þjálfa Deco aftur.

„Ég hjálpaði Deco að þroskast sem leikmaður á sínum tíma og hann er líka einn af þeim leikmönnum sem hjálpuðu mér að verða þjálfarinn sem ég er í dag. Ef að hann kemur til Inter þá verður það frábært fyrir okkur báða held ég," segir Mourinho.

Miðvörðurinn Ricardo Carvalho hjá Chelsea hefur einnig verið sterklega orðaður við Inter undanfarið en hann var einmitt einnig í liði Porto árið 2004 og svo var það Mourinho sem fékk hann til Chelsea á sínum tíma. Meiri óvissa er með hvort Carvalho en Deco gæti farið til Inter á allra næstu dögum samkvæmt ítölskum fjölmiðlum.