Lögreglukona gagnrýnir Stefán Eiríksson í opnu bréfi

Lögreglukonan Bylgja Hrönn Baldursdóttir sendir Stefáni Eiríkssyni, lögreglustjóra á höfuðborgarsvæðinu, tóninn í opnu bréfi sem hún sendi honum í dag. Hún segir lögreglustjórann því miður á góðri leið með að missa lögreglumennina frá sér.

Í bréfinu segir Bylgja það ekki launin sem hafi haldið sér í starfinu í hátt á annan áratug, heldur hrein og klár væntumþykja um vinnuna og vinnufélagana.

Hún segir áreiti utan frá eitthvað sem fylgi starfinu, en áreiti innan frá sé hins vegar óþolandi; óþægindi, óvissa og óánægja sem virki eins og krabbamein á lögregluna.

„Þar kemur til þinna kasta það er þitt hlutverk að stjórna stofnuninni þannig að fólk geti starfað þar í sátt og samlyndi, þú berð ábyrgð á því sem vel er gert og líka því sem er illa gert," segir í bréfi Bylgju.

Hún segir breytingar sem framundan eru innan lögreglunnar búa til aðstæður sem gætu kallað á sundrungu.

„Ég er að vísa þarna til vaktakerfisbreytinga," segir Bylgja í samtali við fréttastofu, sem hún telur aðspurð að sé nánast algjör óánægja með.

„Menn eru hræddir við þessar breytingar og hafa áhyggjur af því hvaða áhrif þetta hefur á fjölskyldulíf þeirra með aukinni viðveru og auknu álagi."

Hún segist ekki óttast skammir þrátt fyrir hið harðorða bréf.

„Það er svona sem mér líður í dag og ég veit að ég er ekki ein um það. Mér er meira virði að fá traust frá vinnufélögum mínum og þó ég sé skömmuð þá skiptir það engu máli."

Bréf Bylgju má lesa í heild hér.