Robinho hvetur City til að kaupa Tevez

Framtíð Carlos Tevez hjá Manchester United er enn í óvissu en tveggja ára lánssamningur kappans við Englandsmeistarana er senn á enda.

Forráðamenn United hafa verið tregir til þess að mæta verðmiðanum sem settur er á Tevez upp á um 30 milljónir punda en það gæti nú breyst eftir að metkauptilboð Real Madrid í Cristiano Ronaldo var samþykkt.

Tevez var hins vegar ekki ánægður með hvað hann fékk fá tækifæri með United á nýafstaðinni leiktíð og gæti því viljað leita á önnur mið.

Liverpool og Manchester City eru bæði talin fylgjast vel með gangi mála hjá Tevez og Brasilíumaðurinn Robinho hjá City hefur hvatt félag sitt til þess að hafa hraðar hendur og gera allt til þess að fá Tevez.

„Það yrði mér mikill heiður og sönn ánægja að spila við hlið Tevez hjá City. Hann er klárlega einn besti leikmaður heims og það er synd að leikmaður á borð við hann fái ekki þau tækifæri sem hann á skilið hjá United. Ef City nær að hreppa hann þá er ég sannfærður um að við myndum gera það gott í framlínunni saman," segir Robinho í samtali við götublaðið The Sun.