Fabregas ekki til Barcelona

Pep Guardiola, knattspyrnustjóri Barcelona, segir að Cesc Fabregas, leikmaður Arsenal, sé ekki á leið til Börsunga nú í sumar.

Fabregas hefur reyndar einnig verið orðaður við AC Milan í sumar en Guardiola sagði í samtali við spænska fjölmiðla að það væri ómögulegt að reyna að kaupa hann frá Arsenal.

„Arsene Wenger hefur þegar selt Kolo Toure og Adebayor sem eru mikilvægir leikmenn. Við þurfum að vera raunhæfir og það er því enginn möguleiki á því að Cesc komi í ár," sagði Guardiola í samtali við dagblaðið Sport á Spáni.

„Ég er ánægður með núverandi leikmannahóp minn. Félagaskiptaglugginn er enn opinn og það er fólk að vinna í þessum málum fyrir okkur. Eftir fimmtán daga vitum við hvernig leikmannahópurinn okkar verður skipaður."