Adriano aftur valinn í brasilíska landsliðið

Vandræðagemsinn Adriano hefur væntanlega ekki verið mjög þunglyndur í dag þegar hann fékk þau tíðindi að búið væri að velja hann í brasilíska landsliðið á nýjan leik.

Adriano lék síðast með landsliðinu í febrúar á þessu ár. Eftir það datt hann í ruglið, lét sig hverfa í Brasilíu, fékk sig lausan frá Inter og fór heim að stokka spilin.

Hann spilar nú með Flamengo í heimalandinu og virðist hafa fundið ánægjuna á nýjan leik. Í það minnsta er hann markahæstur í brasilísku deildinni.

Lucas Leiva, leikmaður Liverpool, er einnig í hópnum eftir að hafa staðið sig vel með enska félaginu. Hann hefur ekki leikið með landsliðinu í tæpt ár.

Brasilía mætir Argentínu þann 5. september og svo Chile fjórum dögum síðar.

Hópurinn:

Markverðir: Julio Cesar (Inter Milan), Victor (Gremio);

Varnarmenn: Andre Santos (Fenerbahce), Daniel Alves (Barcelona), Maicon (Inter), Filipe (Deportivo La Coruna), Lucio (Inter), Luisao (Benfica), Miranda (Sao Paulo), Juan (AS Roma);

Miðjumenn: Elano (Galatasaray), Felipe Melo (Juventus), Gilberto Silva (Panathinaikos), Josue (VfL Wolfsburg), Ramires (Benfica), Julio Baptista (AS Roma), Kaka (Real Madrid), Lucas (Liverpool);

Framherjar: Luis Fabiano (Sevilla), Nilmar (Villarreal), Robinho (Manchester City), Adriano (Flamengo).