Ákveða hvenær fólk er með vinum

„Ég skil ekki hvaða Stasi-vinnubrögð þetta eru,“ segir Jóhann Hlíðar Harðarson, einn skipuleggjenda bekkjarmóts 1963-árgangs Hólabrekkuskóla. Í Fréttablaðinu í gær var sagt frá því að STEF krafði að­standendur mótsins um leyfisgjald til þess að flytja tónlist á samkomunni, sem haldin verður 5. september. Gjaldið getur numið um 23 þúsund krónum. Jóhann segist ósáttur við vinnubrögð STEFs.

„Ég hélt upp á fertugsafmælið mitt þar sem komu tvisvar sinnum fleiri og ekki þurfti ég að borga leyfisgjald. Hins vegar segir STEF að ef ég myndi halda vinnustaðapartí þyrfti ég að borga. STEF virðist ákveða hvenær þú ert með vinum þínum og hvenær ekki.“

Áminning um leyfisgjaldið kom vegna auglýsingar sem birtist í Fréttablaðinu. Gerður er greinarmunur á því hvort um sé að ræða opinbera samkomu eða einkasamkvæmi þegar gjaldið er innheimt.

„Ég vil svör við því hvort STEF innheimti af öllum bekkjar­mótum. Bekkjarmót eru ekki opinberar samkomur heldur lokaðar. Enginn kemst inn nema að hafa verið í árganginum,“ segir Jóhann.

„Ég hlýt að geta breytt bekkjar­mótinu í afmæli hjá einhverjum í hópnum sem á afmæli á þessum degi og svo skemmtilega vill til að hann býður bara þeim sem voru með honum í árgangi.“