Umfjöllun: Baldur afgreiddi Grindavík

Tvö skallamörk frá Baldri Sigurðssyni dugðu bikarmeisturum KR gegn Grindavík í kvöld. KR vann því báðar viðureignirnar gegn Grindavík í sumar en KR vann fyrri leikinn í Grindavík, 0-4.

Leikurinn var liður í 13. umferð mótsins þó svo aðeins séu búnar átta umferðir. KR er aftur á móti í Evrópukeppni og því varð spila þennan leik núna.

Grindvíkingar byrjuðu leikinn nokkuð vel og Ondo hættulegur frammi. KR-ingar tóku þó völdin á vellinum smám saman og eftir 20 mínútur stýrðu þeir algjörlega umferðinni.

Þeir fengu aragrúa af hornspyrnum í leiknum og eftir tvær slíkar skoraði Mývetningurinn Baldur Sigurðsson. Báðar spyrnurnar komu frá Guðmundi Benediktssyni og mörkin með fimm mínútna millibili.

Fyrst skallaði Baldur nánast af línu í netið og seinna markið var fallegra enda skalli utar í teignum. Baldur fékk síðan höfuðhögg í seinni hálfleik og varð að fara á sjúkrahús.

Hann lék annars afar vel, var síógnandi frammi, vann boltann aftar á vellinum og Grindvíkingar réðu lítið við hann.

KR-liðið var sterkt í þessum leik. Spilaði flottan og skemmtilegan fótbolta lungann úr fyrri hálfleik. Þá gekk boltinn hratt og kantarnir notaðir vel og þá aðallega sá vinstri þar sem Diogo fór oft mikinn.

Óskar Örn var slakur á hinum kantinum og virðist vera bestur þegar hann kemur af bekknum því ekki hefur hann skilað miklu þegar hann er í byrjunarliðinu.

KR-ingar klipptu Ondo og Ramsay vel úr leiknum og við svo búið átti Grindavík engin svör. Þeir byrjuðu vel en svo fjaraði undan þeirra leik og þeir sköpuðu ekki eitt alvöru færi í síðari hálfleik.

Sanngjarn sigur KR sem er komið aftur á beinu brautina.

KR-Grindavík 2-0

1-0 Baldur Sigurðsson (31.)

2-0 Baldur Sigurðsson  (36.)

Áhorfendur: 1.011

Dómari: Örvar Sær Gíslason 5

Skot (á mark): 19-16 (11-3)

Varin skot: Stefán 3 – Óskar 9

Horn: 16-2

Aukaspyrnur fengnar: 14-10

Rangstöður: 1-2

KR (4-4-2)

Stefán Logi Magnússon  5

Skúli Jón Friðgeirsson  6

Grétar Sigfinnur Sigurðsson  6

Mark Rutgers  6

Jordao Diogo  7

Óskar Örn Hauksson  3

(74., Atli Jóhannsson  -)

Jónas Guðni Sævarsson  6

Bjarni Guðjónsson  7

Baldur Sigurðsson  8 – Maður leiksins

(70., Guðmundur Pétursson  4)

Guðmundur Benediktsson  5

(81., Prince Rajcomar  -)

Gunnar Örn Jónsson  6

Grindavík (4-5-1)

Óskar Pétursson  8

Ray Anthony Jónsson  3

Zoran Stamenic  6

Bogi Rafn Einarsson  6

Jósef Kristinn Jósefsson  4

Orri Freyr Hjaltalín  4

Jóhann Helgason  3

Óli Baldur Bjarnason  2

(77., Eysteinn Húni Hauksson  -)

Sylvain Soumare  3

(77., Þórarinn Kristjánsson  -)

Scott McKenna Ramsay  4

Gilles Mbang Ondo  5

Leiknum var lýst beint á Boltavakt Vísis og Fréttablaðsins. Til þess að skoða lýsinguna þarf að smella hér: KR - Grindavík