Morðvopnið brotið í mél í barsmíðunum

Áhaldið sem notað var til að myrða mann í Dalshrauni í Hafnarfirði á mánudags­kvöld var mölbrotið eftir atganginn og svo illa farið að lögreglumenn áttu erfitt með að greina hvað það var. Samkvæmt heimildum blaðsins var um einhvers konar eldhústæki að ræða, líklega brauðrist eða grill, um eða yfir kíló að þyngd.

Rúmlega þrítugur karlmaður, Bjarki Freyr Sigurgeirsson, sætir nú einangrunarvist á Litla-Hrauni grunaður um morðið og verður í gæsluvarðhaldi til 1. september hið minnsta. Hann kærði ekki úrskurðinn til Hæstaréttar.

Hinn látni var kunningi Bjarka og í heimsókn í litlu leiguherbergi hans í húsinu að Dalshrauni. Svo virðist sem þeim hafi sinnast með þeim afleiðingum að Bjarki barði manninn ítrekað í höfuðið með eldhústækinu. Lítil ummerki um átök voru í herberginu, sem er litlu stærra en fangaklefi samkvæmt heimildum Fréttablaðsins. Árásin virðist einungis hafa átt sér stað í einu horni þess.

Fórnarlambið marghöfuðkúpubrotnaði við árásina og var afar illa leikið á eftir. Er það mat lögreglu að maðurinn hafi líklega misst meðvitund nær samstundis við barsmíðarnar og áverkarnir hafi dregið hann mjög fljótt til dauða. Hann bar ekki teljandi áverka nema á höfði.

Bjarki Freyr var í annarlegu ástandi þegar hann bankaði alblóðugur en pollrólegur upp á hjá nágranna sínum á eftir og sagði félaga sinn hafa slasast við að leika Köngulóarmanninn. Bjarki var handtekinn í kjölfarið.

Ekki fæst uppgefið hvort Bjarki hefur játað á sig morðið, en að sögn Friðriks Smára Björgvinssonar yfirlögregluþjóns beinist grunur ekki að neinum öðrum. Hann segir rannsóknina í raun langt komna. Tæknideildin vinni nú úr gögnum auk þess sem enn sé verið að ræða við vitni sem voru í húsinu þegar morðið var framið.

stigur@frettabladid.is