Aðeins þrír varamenn hjá Georgíu

Georgía er aðeins með þrjá varamenn á leikskýrslu sinni fyrir landsleikinn við Ísland sem hefst á Laugardalsveli klukkan 19.30.

Alls eru níu breytingar gerðar á byrjunarliði Georgíu sem tapaði, 2-0, fyrir Ítalíu í undankeppni HM 2010 á laugardaginn. Landsliðsfyrirliðinn, Kakha Kaladze, skoraði tvö sjálfsmörk í leiknum en hann er ekki í liði Georgíu í kvöld.

Af þeim þremur varamönnum sem Georgía er með er einn varamarkvörður. Þeir tveir útileikmenn sem sitja á bekknum í kvöld voru í byrjunarliði Georgíu nú um helgina og því ljóst að Hector Cuper, landsliðsþjálfari Georgíu, ætlar að gefa eins mörgum nýjum mönnum og mögulegt er tækifærið í kvöld.

Það vekur þó mikla athygli að aðeins fjórtán leikmenn komu með liðinu til Íslands, þó svo að um vináttuleik er að ræða.