Wenger: Of hár verðmiði á Chamakh

Arsene Wenger, knattspyrnustjóri Arsenal, segist ekki ætla að hækka tilboð sitt í Marouane Chamakh.

Arsenal vill fá þennan sóknarmann Bordeaux en franska félagið hefur sett of háan verðmiða á hann að mati Wengers.

„Chamakh er frjálst að tala við hvaða félag sem er eftir fimm mánuði ef hann framlengir ekki við Bordeaux. Þá gæti Bordeaux misst hann án þess að fá neitt í sinn hlut," segir Wenger.

„Eins og staðan er núna þá er málið úr sögunni. Við erum ekki að fara að borga þennan pening sem Bordeaux setur upp. Ég er hrifinn af Chamakh en ég er enn með Theo Walcott, Nicklas Bendtner, Robin van Persie, Eduardo og Andriy Arshavin. Ég hef því engar áhyggjur."

„Að mínu mati var tilboð okkar mjög sanngjarnt þegar við horfum til þess hvernig markaðurinn er," segir Wenger.

Jean-Louis Triaud, stjórnarformaður Bordeaux, segir að verðmiðinn á Chamakh sé svona hár því innan félagsins hafi allir gríðarlegt álit á honum. „Ég viðurkenni að við gætum lækkað verðmiðann en tilboð Arsenal er samt enn nokkuð fjarri lagi," sagði Triaud.