Klapparstígsbruni: Slökkviliðsmennirnir telja sig heppna

Reykkafarar sem voru hætt komnir þegar eldur kom upp í timburhúsi við Klapparstíg í nótt. Þeir segja heppni og tilviljun hafa ráðið því að þeir urðu ekki eldinum að bráð.

Skömmu áður en slökkvilið kom á vettvang við Klapparstíg í nótt hafði ungur maður sem átti leið þarna hjá, Arnar Halldórsson, farið inn í brennandi húsið og gert íbúum viðvart. Nokkrir íbúar sem fréttastofa ræddi við í dag segja að engu hefði munað að fólkið hefði orðið inni í húsinu.

Slökkviliðið ákvað senda tvo reykkafara, Sigurjón Ólafsson og Ásgeir, inn í húsið en talið var að maður væri á þriðju hæð. Reykkafararnir fóru upp um stigagang sem þá var reykfrír en þegar þeir komu á þriðju hæð hafði eldur læst sig í stigahúsið og lokað útgönguleiðum.

,,Við náðum að hörfa út að útvegg og þá er öll hæðin byrjðu að loga. Þetta leit ekki vel út. Útgönguleiðin var brostin og við urðum að finna okkur nýja leið út," sagði Ásgeir.

Sigurjón og Ásgeir voru með slöngu og reyndu að hafa hemil á eldinum. Hann stigmagnaðist hins vegar og sótti í átt að þeim þar sem þeir voru króaðir af við útvegg hæðarinnar

,,Sigurjón finnur þá að það er eitthvað gler þarna sem hann kýldi í gegnum," sagði Ásgeir. Þeir áttuðu sig á því að þarna voru svalir.

Mennirnir brutu sér leið út á svalir en það mátti varla tæpara standa

,,Það er gríðarleg heppni að við uppgötvuðum að þarna voru svalir," sagði Sigurjón.

Strákarnir voru þó enn í hættu. Mikill hiti var á svölunum vegna eldsins sem logaði í húsinu. Stigi var settur upp að svölunum og þurftu strákarnir að hafa hraðar hendur. Stiginn snérist þegar Sigurjón steig á hann sem féll niður og lenti á lögreglumanni.

Ásgeir náði svo að klifra niður svalirnar og komst þannig heill á húfi frá eldinum.