Scolari: Fær 2,3 milljarða fyrir að þjálfa lið í Úsbekistan

Það er svo sannarlega líf eftir það að vera rekinn frá Chelsea. Það sannar Luis Felipe Scolari sem er orðinn launahæsti þjálfari heims eftir að hafa gert ótrúlegan 18 mánaða samning við lið Bunyodkor frá Úsbekistan.

Scolari fær 13 milljónir evra (2,3 milljarðar íslenskra króna) fyrir þessa átján mánuði sem er tveimur milljónum evra meira en Jose Mourinho fær á ári fyrir að stjórna ítalska liðinu Inter.

Scolari heldur því þó fram að hann hafi ekki tekið við liðinu peninganna vegna. „Ég er kominn hingað af því að ég hef trú á að ég geti hjálpað til við að gera fótboltann betri í Úsbekistan. Ég hef auk þess trú á þessu verkefni," sagði Scolari við ítalska blaðið Corriere Dello Sport.