Kostnaður við skrifstofu hjá Evrópulögreglunni tvöfaldaðist

Kostnaður við rekstur skrifstofu Ríkislögreglustjóra hjá Evrópulögreglunni í fyrra var tvöfalt meiri en áætlanir gerðu ráð fyrir. Tengslafulltrúi Ríkislögreglustjóra segir dómsmálaráðuneytið nú kanna framtíðarfyrirkomulag starfsins. Lögreglustjóri höfuðborgarsvæðisins segir það þegar hafa skipt sköpum við lausn stórra glæpamála.

Europol er löggæslustofnun Evrópusambandsins með höfuðstöðvar í Haag í Hollandi. Ísland er aðili að henni með tengslaskrifstofu sem stofnuð var 2007. Tengslafulltrúi er Arnar Jensson, aðstoðaryfirlögregluþjónn hjá Ríkislögreglustjóra. Þar starfa tengslafulltrúar frá öllum tuttugu og sjö Evrópusambandsríkjunum auk ríflega tuttugu annarra ríkja til viðbótar.

Áætlaður rekstrarkostnaður íslensku skrifstofunnar var tólf milljónir króna 2007 og óbreytt 2008. Raunkostnaður 2007 var átján milljónir og í fyrra tuttugu og tvær milljónir. Sextán milljónir allt í allt sem Ríkislögreglustjóraembættið hefur greitt af fjárveitingum til annarra verkefna og þá með hagræðingu.

Arnar segir þetta greiða uppihald og rekstur skrifstofunnar en á móti hafi sem dæmi verið haldin sérfræðinámskeið á vegum Europol á Íslandi og íslenskir lögreglumenn farið út í nám. „Þannig að við höfum fengið beinan kostnað til baka að talsverðum hluta," segir Arnar.

Arnar segir fjárveitingar til tengslaskrifstofunnar í endurskoðun hjá dómsmálaráðuneytinu. „Fyrri hluti þessa árs átti að fara í fyrsta lagi í aðmeta þann árangur sem út úr þessu hefur komið og taka ákvörðun um hvort Ísland vilji halda áfram að reka þessa skrifstofu hér. Og í öðru lagi þá hvernig það yrði gert og setja það þá í einhvern tiltekinn fjárhagslegan farveg til framtíðar. En þessari vinnu er ekki lokið," segir Arnar.

Mál til tenglsaskrifstofunnar koma þangað frá löggæsluembættum á Íslandi. Stefán Eiríksson, lögreglustjóri höfuðborgarsvæðisins, segir samstarfið hafa skipt sköpum í mörgum stórum málum. „Það er nú hægt að nefna nýleg mál eins og afmetamínverksmiðjumálið í Hafnarfirði þar sem við fengum aðgang að tækni og sérþekkingu sem við búum ekki yfir. Það skipti gríðarlega miklu máli. Og síðan í stórum máli eins og skútumálinu á sínum tíma þar sem það skipti hreinlega sköpum að hafa bæði fultlrúa þarna úti og aðgang að samvinnu við fleiri lögregluyfirvöld," segir Stefán.