Skuldin tífaldaðist

Skuld vegna vangoldinnar brunatryggingar hjá Tryggingamiðstöðinni (TM) upp á 1.549 krónur er komin upp í 14.613 krónur hjá einstaklingi sem seldi íbúðina sína í janúar síðastliðnum. Þrátt fyrir að hann seldi íbúðina í janúar nær greiðslutímabilið frá 1. september 2008 til 3. mars 2009 og hefur skuldin því nálega tífaldast á um ellefu mánuðum.

Viðkomandi fékk í hendurnar bréf frá lögmannsstofunni Lögmáli í gær. Í bréfinu er sagt að ef krafan verði ekki greidd verði hún innheimt með aðför og fasteignin seld á uppboði, án dóms, sáttar eða fjárnáms.

Ragnheiður Dögg Agnarsdóttir, framkvæmdastjóri einstaklingsþjónustu TM, segir málið óheppilegt. Hins vegar hafi innheimtan verið með eðlilegum hætti. Allar kröfur fari í innheimtu eftir þriðju ítrekun. Þá sé krafan komin úr höndum TM og fari eftir taxta lögmannsstofunnar.

„Við nánari skoðun á þessu máli [í gær] kom þó í ljós að það hefði mátt ítreka betur þessa loka­niðurstöðu og við myndum skoða það í þessu tilviki að leysa úr málinu með einhverjum öðrum hætti," segir Ragnheiður.

Krafan er eftirstöðvar af lokauppgjöri við TM en eftirstöðvarnar sjálfar fóru ekki í ítrekun. „Vel mætti skoða í tilvikum sem þessum að bæta við ítrekunum," segir Ragnheiður, sem segir mál af þessu tagi afar fátíð.

Elvar Örn Unnsteinsson, einn eigenda Lögmáls, segir að ekki sé gott þegar smátölur fari í vanskil. Venjulega sé Lögmál ekki að innheimta svona lítil gjöld en gjaldið er hins vegar lögboðið og nýtur lögverndaðs réttar eins og fasteignagjöld.

Sama fasta gjaldið er á kröfum hvort sem höfuðstóllinn er 1.500 krónur eða fimmtán milljónir, að sögn Elvars, því sama vinnan er á bak við innheimtuna. Hjá lögmönnum hafi þróunin verið að minnka vægi prósenta af höfuðstólnum í innheimtu og auka vægi fastra gjalda.

Dráttarvextir eru aðeins 352 krónur af kröfunni. Teknar eru 8.302 krónur í innheimtuþóknun, 1.500 krónur vegna vinnu við kröfuna, 1.000 krónur fyrir veðbókarvottorð og 2.402 krónur fyrir virðis­aukaskatt. Ef krafan er greidd innan tíu daga mun vera gefinn fimmtíu prósenta afsláttur af þóknuninni og virðisaukaskattinum og lækkar krafan þá um 5.352 krónur. vidir@frettabladid.is