Petrov hundleiður á að sitja á tréverkinu hjá City

Búlgarski landsliðsmaðurinn Martin Petrov er allt annað en sáttur þessa dagana vegna skorts á tækifærum í byrjunarliði Manchester City. Petrov skoraði eitt mark í 3-1 sigrinum gegn West Ham á dögunum en var svo ónotaður varamaður í 1-1 jafnteflinu gegn Aston Villa á mánudag.

„Af hverju spilaði ég ekki? Ég var bara að spara mig fyrir landsliðsæfingarnar með Búlgaríu," sagði Petrov í kaldhæðnistóni við búlgarska blaðamenn í dag. Hann fagnaði marki sínu gegn West Ham með því að hlaupa að varamannabekk City og snúa sér við og benda á nafn sitt aftan á búningnum. Hann vildi þó ekki meina að hann hafi verið að senda skilaboð til knattspyrnustjórans Mark Hughes með tilburðum sínum.

„Nei, ég gerði þetta ekki fyrir Hughes. Ég gerði þetta fyrir eiginkonum mína upp í stúku. Ég vildi bara sýna henni númer hvað ég væri. Hún var nefnilega búin að gleyma því," sagði Petrov á léttum nótum.