Leikmaður Burnley sektaður fyrir að drekka bjór í miðjum leik

Framherjinn Steven Thompson hjá nýliðum Burnley í ensku úrvalsdeildinni var sektaður um viku laun eftir að hafa tekið upp á því að fá sér vænan bjórsopa í miðjum leik í æfingarferð félagsins í Bandaríkjunum.

Burnley var að spila við Portland Timbers í lokaleik sínum í Bandaríkjaferðinni og fóru leikar 2-2 og Thompson skoraði seinna mark Burnley en kappinn lét sér það ekki nægja.

Í miðjum leiknum var Thompson í baráttunni við endalínu vallarins og gat ekki stöðvað sig og fór yfir auglýsingaskilti og beint í fangið á áhorfendum. Thompson var fljótur að grípa bjórglas af manni sem sat þar nálægt og fá sér vænan sopa við mikinn fögnuð þeirra áhorfenda sem sáu til hans.

„Það segir kannski mest um gæði leiksins að þetta atvik hafi fengið mesta klappið frá áhorfendum. Þetta var bara smá grín og ég held að allir hafi bara tekið þessu vel. Knattspyrnustjórinn sagði reyndar að hann ætli að sekta mig um viku laun fyrir að vera fyrsti atvinnumaðurinn í fótbolta til þess að drekka bjór á meðan á leik stendur," segir Thompson í viðtali við The Citizen í Burnley.