Tap hjá Liverpool í fyrsta leik

Tottenham vann 2-1 sigur á Liverpool í lokaleik fyrstu umferðar ensku úrvalsdeildarinnar í knattspyrnu í dag.

Benoit Assou-Ekotto og Sebastien Bassong skoruðu mörk Tottenham en Steven Gerrard fyrir Liverpool úr vítaspyrnu.

Leikurinn byrjaði heldur rólega en helst bar það til tíðinda að þeir Jamie Carragher og Martin Skrtel skullu saman er þeir fóru báðir upp í skallabolta. Báðir fengu þungt höfuðhögg en Carragher nokkuð stóran skurð. Skrtel bað svo um skiptingu í miðjum síðari hálfleik, væntanlega vegna höggsins.

Þegar um hálftími var liðinn af leiknum fóru heimamenn að taka frumkvæðið. Pepe Reina varði vel frá Robbie Keane og Jermain Defoe skallaði framhjá úr góðu færi.

Það var svo undir lok fyrri hálfleiksins að fyrsta mark leiksins var skorað. Assou-Ekotto skoraði með föstu skoti eftir að boltinn hafði fallið fyrir fætur hans eftir aukaspyrnu Tom Huddlestone.

Liverpool spilaði betur í upphafi síðari hálfleiks en í þeim fyrri og liðið uppskar víti þegar að Heurelho Gomes braut á Glen Johnson. Steven Gerrard skoraði út vítaspyrnunni og jafnaði metin.

En aðeins þremur mínútum síðar kom Bassong Tottenham aftur yfir með skalla eftir fyrirgjöf Luka Modric úr aukaspyrnu.

Eftir þetta náði Liverpool ekki að jafna metin á ný og leikmenn Tottenham fögnuðum góðum sigri á heimavelli.