Ensku stelpurnar mæta pressulausar til að spilla sigurhátið Þjóðverja

Það er óhætt að segja að Þýskaland sé með sigurstranglegra liðið í úrslitaleik Evrópumóts kvenna sem fram fer í dag þegar Þýskaland og England mætast í Helsinki í Finnlandi.

Þýskaland hefur unnið fjóra Evrópumeistaratitla í röð og ennfremur sex af síðustu sjö Evrópukeppnum kvenna. Enska liðið hefur ekki spilað úrslitaleik á stórmóti í 25 ár og hefur aldrei náð að vinna Þýskalandi í 18 tilraunum. Þýskaland hefur unnið 16 af þessum 18 leikjum.

„Þjóðverjarnir eru þegar búnir að skipuleggja sigurhátíðina en það setur bara meiri pressu á þeirra lið. Við getum bara eyðilagt partýið fyrir þeim," sagði Hope Powell, þjálfari enska liðsins.

„Við höfum ekkert að óttast og engu að tapa. Við eigum að tapa samkvæmt tölfræðinni en hún hefur ekkert að segja í leiknum sjálfum. Þá er þetta vara spurning um dagsformið og þetta getur alveg orðið okkar dagur," sagði Powell.

„Ég hef séð enska liðið bæta sig mikið á síðustu árum og það kemur mér ekkert á óvart að þær séu komnar alla leið í úrslitaleikinn. Ég sagði það fyrir mótið að enska liðið ætti möguleika á að verða Evrópumeistari," sagði Sylvia Neid, þjálfari Þýskalands.

„Ég þekki Hope Powell og hennar vinnu. Hún hefur nokkra frábæra leikmenn í sínu liði eins og Kelly Smith, Karen Carney. Vörnin þeirra er líka mjög góð og hún hefur unnið frábært starf," bætti Neid við.