Davíð inn fyrir Ragnar

Ólafur Jóhannesson hefur kallað á Davíð Þór Viðarsson í íslenska landsliðið í stað Ragnars Sigurðssonar.

Ragnar kom inn á sem varamaður í blálok leiks Íslands og Noregs í gær og hefur dregið sig úr hópnum af persónulegum ástæðum.

Ísland mætir Georgíu í vináttulandsleik á Laugardalsvelli á miðvikudaginn kemur. Leikurinn hefst klukkan 19.30.

Þrír miðverðir hafa því forfallast síðan að Ólafur Jóhannesson valdi landsliðshóp sinn fyrir leikina gegn Noregi og Georgíu. Þetta eru þeir Hermann Hreiðarsson, Sölvi Geir Ottesen og Ragnar Sigurðsson.

Athygli vekur að þrátt fyrir það hefur Ólafur ekki kallað á annan miðvörð í þeirra stað. Bjarni Ólafur Eiríksson hefur leikið bæði á vinstri kantinum og í vinstri bakverðinum með landsliðinu og þeir Baldur Sigurðsson og Davíð Þór Viðarsson eru báðir miðvallarleikmenn.

Líklegt verður að teljast að Indriði Sigurðsson verði með Kristjáni Erni Sigurðssyni í hjarta íslensku varnarinnar á miðvikudagskvöldið.