Beckham hefur lítið hugsað um að spila í Evrópu

David Beckham sagði eftir landsleik Englands og Hollands í gær að hann hafi lítið leitt hugann að því að koma sér aftur til Evrópu um næstu áramót.

Beckham sagði í viðtali við enska fjölmiðla í gær að hann væri fyllilega einbeittur að því að hjálpa liði sínu, LA Galaxy, í baráttunni í bandarísku MLS-deildinni.

Beckham var lánaður til AC Milan í fyrra og missti af þeim sökum af upphafi tímabilsins í Bandaríkjunum en það hófst í apríl.

Fabio Capello landsliðsþjálfari hefur sagt að nema Beckham spili í Evrópu yfir vetrarmánuðina á hann enga möguleika á sæti í HM-hópi Englands fyrir keppnina í Suður-Afríku á næsta ári.

„Ég mun einbeita mér að LA Galaxy í þá mánuði sem eftir eru af tímabilinu. Þegar það er búið mun ég gera áætlanir fyrir framtíðina. En það er mikilvægt að hafa forgangsröðina á hreinu."

Hann hefur verið orðaður við félög í ensku úrvalsdeildinni en hann segir líklegast að hann fari aftur til Ítalíu. „Maður á aldrei að segja aldrei en ég naut mín vel á Ítalíu og þeir hafa sagst vilja fá mig aftur. AC Milan er eitt besta félag í heimi en ég hef nokkra mánuði til að taka þessa ákvörðun."