Arsenal niðurlægði Everton

Arsenal gerði sér lítið fyrir og vann 6-1 sigur á Everton í lokaleik dagsins í ensku úrvalsdeildinni.

Brasilíumaðurinn Denilson skoraði fyrsta mark leiksins á 26. mínútu með glæsilegu skoti eftir laglegan undirbúning Nicklas Bendtner og Cesc Fabregas.

Næstu tvö mörk voru keimlík. Það fyrra skoraði nýliðinn Thomas Vermaelen með skalla eftir fyrirgjöf Robin van Persie úr aukaspyrnu. Van Persie tók svo aðra aukaspyrnu örskömmu síðar og nú var það William Gallas sem skoraði með skalla framhjá Tim Howard markverði.

Stuðningsmenn Everton voru ekki ánægðir í hálfleik en ástandið átti bara eftir að versna í þeim síðari.

Fabregas skoraði fyrstu tvö mörk Arsenal í síðari hálfleik, það fyrra með hnitmiðuðu skoti eftir fyrirgjöf van Persie. Síðara mark Fabregas kom eftir einnig laglegt skot.

Sjötta markið skoraði svo varamaðurinn Eduardo en hann fylgdi eftir skoti Andrey Arshavin í stöng.

Louis Saha náði að klóra í bakkann fyrir heimamenn í uppbótartíma er hann fylgdi eftir skoti Steven Pienaar sem Manuel Almunia náði að verja.

Leikmenn Arsenal fóru því hreinlega á kostum í dag en margir höfðu efast um að liðið gæti gert alvöru atlögu að enska meistaratitilinn eftir að félagið missti þá Kolo Toure og Emmanuel Adebayor frá sér í sumar. En eftir þennan leik er ljóst að liðið er til alls líklegt.