Umfjöllun: Hjálmar tryggði Fram sigur

Hjálmar Þórarinsson skoraði eina markið þegar Fram vann Grindavík 1-0 í sextán liða úrslitum VISA-bikarsins í kvöld. Framlengingu þurfti til að knýja fram úrslit en Hjálmar skoraði strax á fyrstu mínútu hennar.

Leikurinn var ekki mjög mikil skemmtun og fótboltinn ekki ýkja fagur. En baráttan var til staðar. Grindvíkingar fengu fyrsta færi leiksins í gær. Scott Ramsey átti fast skot eftir sautján mínútna leik, tók boltann á lofti en skotið fór yfir markið. Paul McShane átti fyrstu alvöru skottilraun Framara en Óskar Pétursson gerði vel með því að verja í horn.

Grindvíkingar voru beittari í fyrri hálfleik án þess að mörg færi litu dagsins ljós. Svipuð deyfð var yfir seinni hálfleiknum og þeim fyrri en þó mátti minnstu muna á 66. mínútu þegar myndaðist ótrúleg þvaga. Boltinn gekk milli manna í vítateig Grindvíkinga og hvert skot Framara á fætur öðru reið af. Gestirnir höfðu þó heppnina með sér og ekki fór knötturinn inn.

Paul McShane fékk sannkallað dauðafæri sem hann nýtti herfilega. Hann fékk góðan tíma, jafnvel of góðan því skot hans fór yfir. Gilles Ondo átti ágætis skottilraun hinumegin en framhjá sigldi knötturinn.

Eysteinn Húni Hauksson fékk besta færi Grindvíkinga í venjulegum leiktíma eftir vel tímasetta sendingu frá Scott Ramsey en Hannes Þór Halldórsson kom út á móti og bjargaði vel. Ekkert var skorað í venjulegum leiktíma og því haldið í framlengingu eins og siður er.

Framlengingin var varla hafin þegar Fram hafði tekið forystuna. Bogi Rafn Einarsson gerði sig sekan um slæm mistök og Hjálmar Þórarinsson refsaði fyrir þau með því að skora. Grindavík fékk dauðafæri til að jafna í fyrri hluta framlengingarinnar en þá misnotaði Gills Ondo dauðafæri.

Grindvíkingar voru ógnandi í fyrri hluta framlengingar en í seinni hálfleik hennar var greinileg þreyta farin að sjást á leikmönnum og úrslitin 1-0 sigur Fram. Safamýrarpiltar fögnuðu vel þegar mjög góður dómari leiksins, Valgeir Valgeirsson, flautaði leikinn af.

Fram - Grindavík 1-0

1-0 Kristján Hauksson (91.)

Laugardalsvöllur.

Dómari: Valgeir Valgeirsson.

Fram:

Hannes Þór Halldórsson

Paul McShane

(108. Hlynur Atli Magnússon)

Kristján Hauksson

Auðun Helgason

Halldór Hermann Jónsson

Daði Guðmundsson

Heiðar Geir Júlíusson

Almarr Ormarsson

Ívar Björnsson

(90. Ingvar Ólason)

Jón Guðni Fjóluson

(38. Hjálmar Þórarinsson)

Josep Tillen

Grindavík:

Óskar Pétursson

Óli Baldur Bjarnason

Ray Anthony Jónsson

Scott Ramsey

Jóhann Helgason

Þórarinn Brynjar Kristjánsson

(67. Eysteinn Húni Hauksson)

Orri Freyr Hjaltalín

Zoran Stamenic

Bogi Rafn Einarsson

Sylvian Soumare

(90. Sveinbjörn Jónasson)

Gilles Ondo