Barðastrandarræningjarnir dæmdir í fangelsi

Fjórir piltar voru dæmdir í Héraðsdómi Reykjavíkur í dag fyrir aðild sína að hinu svokallaða Barðastrandarráni, þar sem ráðist var á úrsmið á Seltjarnarnesi á heimili hans og hann rændur. Málið vakti mikinn óhug en svipað mál hafði komið upp á Arnarnesi skömmu áður.

Fjórir voru ákærðir í málinu. Tveir fyrir að brjótast inn í hús við Barðaströnd og ráðast á húsráðanda. Einn var ákærður fyrir að aka ræningjunum til og frá vettvangi og sá fjórði fyrir skipulagningu ránsins.

Viktor Már Axelsson hlaut þyngsta dóminn eða tveggja ára óskilorðsbundinn dóm. Jóhann Kristinn Jóhannsson hlaut þriggja mánaða skilorðsbundinn dóm. Marvin Kjarval Michelsen hlaut 12 mánaða óskilorðsbundinn dóm og Axel Karl Gíslason sem skipulagði ránið hlaut 20 mánaða óskilorðsbundinn dóm.

Barðastrandarmálið er annað af tveimur málum sem komu upp með skömmu millibili fyrr á þessu ári sem áttu það sameiginlegt að brotist var inn á heimili og ráðist á húsráðendur og þeir rændir. Bæði málin vöktu athygli og óhug þegar þau komu upp enda nánast án fordæma hér á landi. Annað ránið var framið á Arnarnesi en dæmt var í því í júlí. Höfuðpaurarnir fengu tveggja og tveggja og hálfs árs fangelsisdóm.

Við aðalmeðferð málsins kom úrsmiðurinn á Barðaströnd fyrir rétt og lýsti upplifun sinni af ráninu. Hann sagði m.a. frá því hvernig annar innbrotsþjófurinn réðst á hann og kýldi hann í andlitið. Hann var þvínæst bundinn á höndum og fótum og hótað að hann yrði spreyjaður með piparúða ef hann hreyfði sig. Úrsmiðurinn er á áttræðisaldri og sagðist hafa óttast um líf sítt þar sem hann lá á gólfinu með hendur bundar fyrir aftan bak.

Á meðan fór annar þjófurinn um húsið í leit að sjaldgæfum og verðmætum úrum sem úrsmiðurinn hefur safnað í gegn um árin. Svo virðist sem þjófarnir hafi vitað af þessum verðmætum því þeir höfðu fátt annað á brott með sér. Alls tók ránið einhverjar 15 mínútur en þá höfðu þjófarnir sig á brott en skildu úrsmiðinn eftir bundinn. Hann náði á endanum að losa sig og hringja á hjálp.